اسلام آباد (نمائندہ خصوصی)۔ حکومتِ پاکستان کی وزارت داخلہ نے تمام سرکاری ملازمین گرینڈ الائنس (AGEGA) کے مطالبات پر غور کرنے کے لیے 11 فروری 2025 کو ایک اعلیٰ سطحی اجلاس طلب کر لیا ہے۔
یہ اجلاس وزیر اعظم کے مشیر برائے سیاسی امور و بین الصوبائی رابطہ، رانا ثناء اللہ خان کی سربراہی میں ہوگا، جو دوپہر 12:30 بجے وزارت بین الصوبائی رابطہ کے دفتر، کوہسار بلاک، پاک سیکرٹریٹ اسلام آباد میں منعقد کیا جائے گا۔ اجلاس میں سرکاری ملازمین کے مسائل اور ان کے ممکنہ حل پر غور کیا جائے گا۔
اجلاس میں دیگر اہم شخصیات بھی شرکت کریں گی، جن میں وزیر مملکت برائے خزانہ علی پرویز، رکن قومی اسمبلی طارق فضل چوہدری، وزارت داخلہ کے اسپیشل سیکریٹری، اسلام آباد کے ڈی آئی جی سیکیورٹی، اور ڈپٹی کمشنر اسلام آباد شامل ہیں۔
علاوہ ازیں، آل گورنمنٹ ایمپلائیز گرینڈ الائنس (AGEGA) کے صدر، رحمان علی باجوہ کو بھی اس اجلاس کی اطلاع دے دی گئی ہے۔ اس حوالے سے ملازمین کو جلد کسی اہم پیش رفت کی امید ہے، جبکہ حکومتی سطح پر بھی اس معاملے کو سنجیدگی سے لیا جا رہا ہے۔